- Фидиуæг
-
I
– хабархæссæг, хабархъусынгæнæг. Алы ирон хъæуы дæр уыдис фидиуæг, йæ хæс уыдис хъæубæстæн уæлдай ахсджиаг хабæрттæ хъусын кæнын, хицæн бинонты куывдмæ кæнæ хъæугуывдтæм хонын, æхсæны Ныхасмæ фæдзурын æмæ æнд. ах. Фидиуæг æвзæрстой, рæстæмбис кары, йе та ацæргæ чи уыдис, ахæм тыхджын хъæлæсджын нæлгоймæгты. Фидиуæг йæ куысты ныхмæ алы куывдæй дæр уыдис хай – фидиуæджы хай. Куырд-иу цы хъæуы нæ уыд, уым-иу кусарты царм æнæмæнг хаудис фидиуæджы хаймæ. Куырд цы хъæуты уыдис, уым та фидиуæг йемæ дих кодта кусарты царм. Арæхдæр ай лæвæрдтой куырдæн. Иу къорд хъæуы уыдис сæрмагонд бынат, бæрзонддæр ран, хуыдтой йæ фидиуæн. Уырдыгæй фидиуæг хъæубæстæн хъусын кодта йæ хъусынгæнинæгтæ.II– сигналон фугæнгæ инструмент; раздæр-иу иумæйаг цуаны рæстæг чи хъуыдис, ахæм дзаума. Арæзтой йæ галы кæнæ дзæбидыры сыкъайæ; акодтой-иу дзы 2-4 хуынчъы, равзæрдис-иу дзы цалдæр алыхуызон цъæхснаг зæлы, цуанæттæ сæ пайда кодтой кæрæдзимæ бæрæг сигналтæ дæттынæн.
Словарь по этнографии и мифологии осетин. 2014.